INUPLAN nunani tamalaani saqqummerpoq.
|
Ulloq: 22.12.2011
|
 |
INUPLAN nunani tamalaani saqqummerpoq
Kalaallit Nunaanni suliffeqarfik ingeniørit siunnersuisarfiattut ingerlatsisup pinngortitalerinermut avatangiisilerinermullu immikkoortortaqarfiata nunanut allanut suleqateqarnissaminut suliniuteqarluni ingerlatsinera inerneqarluarpoq. Canadami suliffeqarfissuaq suleqatigalugu INUPLAN A/S suliffeqarfissuit allat akornganni avatangiisit pillugit misissuinissamut isumaqatigiissusiornermut ajugaavoq taamaasillunilu Mærsk Oil sullittussanngorlugu.
INUPLAN ukiup ataatsip matuma siornatigut million koruunit arlalerlugit aningaasaliinermikkut avatangiisit pinngortitarlu pillugit immikkoortortaqalerpoq, taannalu sisamanik sulisoqarpoq. Taamaaliorput nalugaluarlugu siunissami suliassaqarnerlutik.
”Taamaasiornitsinnut pissutaavoq takusinnaasimagatsigu piginnaasagut nunani allani suliffeqarfissuarnit piumaneqarluarsinnaanissaat, minnerunngitsumillu pisortaqarfinni ingerlatsisut aamma sullissinnaanissaat”, taama oqarpoq INUPLAN-imi pisortaq Kristian Lennert. ”Suliffeqarfissuit soqutiginnillutik saaffiginninnissaannut piareersimajumalluta siorna aningaasat sinneqartoorutigut immikkoortissimavagut. Suliffeqarfittut ineriartorusukkaanni suliassat aaliangersimasut takkunnissaannut utaqqiinnarneq iluaqutaanngimmat piaartumik piareersareersimavugut. Suliffeqarfissuit Mærsk Oil-itut ittut suliffeqarfitsinnut tatiginnilersikkumallugit ulloq siullermiit sulianut paasisimasaqarluartuunissaq takutissinnaanissaa pisariaqarpoq, paasisimasaqassuserlu ilisimasatsitut piffissaq sivisooq atorlugu ineriartortinneqartarluni. Piffissaq taanna piginnaasaqassutsinnik ineriartortitsinermik atorsimasarput iluatsilluartutut inerneqarpoq.”
Isumaqatigiissut iluanaarfiusinnaasoq
”Nunarsuarmioqatigiit akornganni suliffeqarfiuvugut mikisoq taamaammallu suli Mærsk Oil-imut toqqaannartumik isumaqatigiisusiorsinnaanata, taamaattorli Canadameersoq Golder Association suleqatigalugu isumaqatigiissusiorneq pissarsiaraarput, qaammatinilu aggersuni Mærsk-ip 3D atorlugu immamik sajuppillatsitsilluni misissuinissaa sioqullugu INUPLAN avatangiisinut sunniutaasinnaasunut misissuissaagut, tamannalu pissalluni Upernaviup eqqaani nunaqarfinni Tasiusap aamma Nuussuup avataanni”.
”Isumaqatigiissusiorneq taamaattoq uagutsinnut pattalaarinninneruvoq nersualaarinninnerullunilu, suliffeqarfitsinnuinnaanngitsoq aammali Kalaallit Nunaanni siunnersuisarfinnut tamanut. Suliakkiissut INUPLAN-ip kusanartumik naammassilluaruniuk siunissami ilimanaateqarsinnaavoq suliakkiissutip assigisaannik pissarseqqittugut. Nunani allamiunut sullissineq siunissami pitsanngoriarumaarpoq aammalu avatangiisinik misissuisalernissaq eqqarsaatigalugu piginnaasaqassutsimut pitsanngoriaateqarumaarpugut. Aammattaaq neriuutigaara Mærsk Oil-imut suleqatiginninnerput ilutigalugu inuusuttut amerlasuut avatangiisinut pinngortitamullu suliaqarfinnut tunngasunik ilinnialernissaminnut soqutiginnilerumaartut”, Kristian Lennert oqarpoq.
Ilinniarneq isumassarsiorsinnaanerlu INUPLAN-imi pingaartinneqarpoq. Uani takusinnaavasi paasisassarsiorluni angalanermut atatillugu Harpap Reyjkavikkimiittumi sulisut saavani assiliseqatigiittut.
Paasissutissat
INUPLAN, Nuummi Qaqortumilu allaffeqartoq, sanaartornermut tunngasunik pilersaarusiulernermiit naammassinissaq tikillugu siunnersuisarpoq.
Suliffeqarfik sulisunik 10-inik nunatsinneersunik 100 %-imik pigineqarpoq. Suliffeqarfik aningaasatigut tunngavilersorluakkamik ingerlavoq, 30-inillu sulisoqarluni, taakkunani 18-it ingeniøriupput, sisamat ingeniøritut ilinniartut taavalu ilinniartutut ikiortit. Sulisut agguaqatigiissillugu ukiuni 10-ni suliffeqarfimmi sulisimapput ingeniørilli kisiisa isigissagaanni ukiuni 15-ini sulisimallutik.
Pinngortitalerinermut avatangiisilerinermullu immikkoortortaqarfik sisamanik sulisoqarpoq, taakkunanilu suliat makkuupput: Eqqakkanut aqutsineq, pinngortitamut avatangiisinullu misissuinerit, pinngortitamut illersuiniarnerit allallu. Ingeniørit suliarisartagaasa saniatigut pinngortitalerinermut avatangiisilerinermullu immikkoortortaqarfiup suliassarivaa suliffeqarfissuit aatsitassanut ikummatissanullu suliat aallartinnginnerani taavalu ingerlatsineranni inuiaqatigiinnut avatangiisinullu misissuinerit. Taakkualu taaguuteqarput SMV ,VVM, taavalu SIA.
INUPLAN ukiut 50-it miss. Kalaallit Nunaanni sulereerluni misilittagaqarluarpoq pitsaasumillu ineriartorsimalluni. Kalaallit Nunaanni suliarisarsimasaat amerlanerit tassaasimapput sanaartornermut tunngasut.